GEDIGTE EN VERHALE DEUR JONGMENSE BO 16

•  RENSO SMIT 

Johan S. Bak

Wit soos skape

Die antwoorde is nêrens te vind nie
Die oplossings is onoplosbaar
En tog saai Radio Tygerberg dit op F.M. uit
vanuit 'n vergete winkelsentrum

Waar begin die lewe
in Amerika of in Pakistan?
Waarom word my werk
uit tydskrifte verban?

Waar hoort die mens?
Is dit so bedoel
dat ons tussen strate deur krioel?
Waar kry die bedelaar
kos vir sy honger pens?

Sal ons ooit ons wasgoedpennetjies terugvind?
Ooit ontsnap van die visioene
wat ons soos haaie agtervolg?

Kan daar lewe wees op Jupiter?
Hou Marsmanne ook van bier?
Sit hulle ook met die vraagstuk:
Wat maak ons nou eintlik hier?
 

Tronksel

'n Vuil hand groet
vanuit 'n spleet in die gordyn
Êrens sit F.M. met sy H.O.B.
en drink die bloed van 'n konyn

Wat 'n belaglike insinuasie
is dit nie?
Al hierdie oorloë
vir wie?

Al daardie nagte in hospitaalgange
Duisende dossiere van verlange
Bêre dit maar
in my aktetas van onblusbare drange

Nog 'n dominie sonder 'n kerk
Nog 'n huis met geen grasperk
Iewers lê 'n boemelaar
en vrek

Massyn
Pie
Wange
Sterk

Ek sit hier en alles uitwerk
 
 

Oorkant die Jordaan

Ons sal moet dink, ek en jy Connie
Oor waar ons op hierdie aarde staan
Jy vind jou plesier by Moabitiese mans
En ek dra 'n verslete foto
In my rugsak rond

Ons is hees
        Ons is wees
                Ons is albei
Noord-Libanees

Tastend bly ons soek na mense in winkelvensters
Onseker en weerloos oor wat die toekoms inhou
Elke tree wat ons gee in angs
Elke brokkie hoop slegs 'n lugspieëling
Ons is dorre swerwerssmagtend na die see
Brittanje is vol verwers
wat niks vir ons wil gee

Ons is hees
        Ons is wees
                En ons sal albei
Ons koppe moet laat lees

Parys is 'n paddastoel in Maart
Ons drome lê versprei op 'n wêreldkaart